Dore impamvu iri gutuma hari ibihugu byinshi bidafite ibikoresho byo gupima Coronavirus.

  • by

Mu cyumweru cya mbere cya Mutarama 2020, hasohotse raporo ivuga ku cyorezo kitazwi cyari cyagaragaye ku bantu mu Bushinwa, aho bamwe ubuzima bwabo bwari mu kaga.

Icyo nta kindi ni Coronavirus ubu imaze kwandura abarenga ibihumbi 465 ku Isi, naho abarenga ibihumbi 21 imaze kubahitana.

Umudage Olfert Land, umuhanga umaze imyaka 30 akora mu bijyanye n’indwara z’ibyorezo, zirimo izibasira ubuhumekero bwa muntu yumvise iby’iki cyorezo, ashaka uko yakora igipimisho cyafasha abaganga gupima iyi ndwara, kandi ashaka kubikora vuba.

Ikigo cya Landt cyitwa, TIB Molbiol nacyo kimaze imyaka 30 , cyahise gitangira akazi.

Tariki 9 Mutarama, Landt yatangiye kugerageza agapimisho ku nshuro ya mbere, bagendeye ku ka SARS n’ibindi byorezo bari baragiye bahura nabyo.

Landt ari kumwe n’abandi bahanga bo muri Kaminuza, yakoze udupimisho dutatu.

Tariki 11 Mutarama, Landt yohereje aka gapimisho mu kigo cyo muri Taiwan kirwanya indwara, n’ikindi cyo muri Hong Kong, gusa ntabwo yari azi ko aka gakoresho kari bube agakoreshwa uyu munsi.

Mu mpera z’icyumweru icyo gihe, iyi nzobere yabonye ubutumwa bw’uko “Hagendewe ku bipimo byo muri laboratwari, ubu ushobora gupima abarwayi.”

Tariki 17 Mutarama, Ishami ry’Umuryango w’Abibumbye ryita ku buzima, OMS, naryo ryashyize hanze ibyakozwe na Landt ndetse ribishyira ku rubuga rw’iri shami.

Iki cyahise kiba igikoresho cya mbere gipima iyi virus gishyizwe hanze n’iri shami.

Landt avuga ko yakoze ibi bikoresho miliyoni enye mu mpera za Gashyantare, kuva icyo gihe akora ibirenga miliyoni 1.5 buri cyumweru.

Buri gapaki kaba karimo udukoresho 100, akakagurisha amayero 160 buri kamwe ku badukeneye, nko mu bihugu birimo Arabie Saoudite, Afurika y’Epfo, Australia, u Burayi n’ahandi.

Landt avuga ko akora aka kazi afashijwe n’abana be babiri n’umugore we.

Agira ati “Ntabwo ndimo gukorera amafaranga, yego hari ayo mbona, ariko turakora akazi keza, ariko nyuma ntabwo dukeneye amafaranga.”

Umuyobozi wa OMS, Dr Director-General Tedros Adhanom, aherutse kugira ati “Dufite ubutumwa bworoshye tugenera ibihugu byose, mupime abantu.”

Nyuma y’ibi bikoresho bya Landt, muri Hong Kong, uwitwa Leo Poon, nawe wagiye akora ubushakashatsi ku byorezo birimo icya SARS, yatangiye gukora ibikoresho byo kwifashishwa mu guhangana na Coronavirus.

Poon avuga ko “Kubera ko twaciye muri ibi byose, tuzi uburyo ari ngombwa kugira igikoresho gikora neza mu gupima, niyo mpamvu dukora uko dushoboye kandi vuba.”

CNN ivuga ko mu gihe cy’iminsi itandatu, Poon nawe yari amaze gukora ibi bikoresho bipima iki cyorezo.

Poon yohereje ibikoresho bye mu bihugu birenga 40 ku Isi harimo Misiri n’ahandi.

Ipaki imwe yakozwe na Poon irimo udukoresho 100, yaguraga amadorali 515.

Poon n’itsinda rye bavuga ko nyuma batangiye gushora amafaranga yabo muri uyu mushinga, ubu barimo kubikorera ubuntu.

Agira ati “Nta mafaranga dufite, ariko turimo gukwirakwiza ibi bikoresho ku bw’ubugiraneza.”

Umwarimu muri Kaminuza ya Yale, Nathan Grubaugh, avuga ko gukora ibi bikoresho bitagoye, ariko igikomeye ari ukugenzura ko bidafata izindi virusi.

Muri Mutarama uyu mwaka, mu Mujyi wa Gisborne mu New Zealand, John Mackay, yabonye ubusabe bwavuye mu kigo gishinzwe ibya laboratwari muri guverinoma ye, asabwa gushaka ibikoresho bagatangira gushaka uko bahangana n’iyi virusi.

John Mackay, yahise yandikira ubutumwa bugufi, Landt amubwira ati “Niba iki cyorezo kimeze nka SARS, ndibwira ko ufite ibipimisho bishobora gukoreshwa.”

Ibi bipimisho byahise byoherezwa muri New Zealand, habura ukwezi ngo babone umuntu wa mbere urwaye Coronavirus.

Bimwe mu bihugu byahisemo kwirwanaho ariko bigorwa no gupima

Mu gihugu cy’u Bushinwa nabo baje kuvumbura ibikoresho bipima iki cyorezo tariki 24 Mutarama, ndetse biza no gushyirwa ku rubuga rwa OMS.

Nyamara ubwo iki cyorezo cyakazaga umurego mu Bushinwa muri Gashyantare, byaje kugaragara ko ibi bipimisho ngo byapimaga abantu bikagaragaza ko nta bwandu bafite, bake muri bo bikemezwa ko barwaye. Ari nayo mpamvu benshi bemeza ko imibare y’abanduye Coronavirus ubushinwa bwatangae ari ibinyoma.

Raporo yasohotse mu kinyamakuru cyo mu Bushinwa, China Daily, umuyobozi w’ishami ry’indwara z’ubuhumekero muri Kaminuza ya Peking, Gao Zhancheng, yavuze ko bishoboka ko hari impamvu zatumaga bigenda gutyo, zirimo abaganga bafata ibizamini ndetse n’ibindi.

Mu ntangiriro kandi byagaragaye ko u Bushinwa bwarimo guhura n’ikibazo gikomeye mu kubona ibi bikoresho bihagije.

Amakuru avuga ko abantu bamwe basabwaga gutegereza ko bapimwa, mu gihe ubwandu bwakomezaga gukara.

Muri Leta Zuze Ubumwe za Amerika bahuye n’akaga

Coronavirus igitangira kuvugwa muri Amerika, Perezida Trump yatangaje ko mu byumweru bibiri byonyine ibikoresho byo gupima Coronavirus biraba bibonetse. Ibyo byumweru byaje gushira ibikoresho bitaraboneka, Trump atangira kurya indimi imbere y’itangazamakuru.

Tariki 17 Mutarama, umunsi OMS yashyiraga hanze igikoresho cyakozwe na Landt, inzego z’ubuzima muri Amerika, zahise zisohora igipimisho cyazo.

Ikigo gishinzwe kurwanya indwara z’ibyorezo muri Amerika, cyatangaje tariki 5 Gashyantare ko cyagombaga gutangira kohereza hanze ibi bipimisho.

Nyuma gato ibigo bimwe byatangiye kuvuga ko ibi bikoresho bidakora, bisobanuye ko hari ibyagombaga kongera gusuzumwa.

Gusa CNN ivuga ko nyuma y’amezi atatu Landt ashyize hanze iki gikoresho, ibihugu hirya no hino ku Isi bikomeje guhura n’ikibazo gikomeye cyo gupima abo bakekaho ubu bwandu bwa Coronavirus.

Kugeza ubu bimwe muri ibi bikoresho ngo ntibikora neza, ibindi biratwara igihe ngo bikore.

Ibi bizamura ikibazo gikomeye, hibazwa uburyo iki gikoresho gishobora gukorwa mu buryo bwihuse, ariko bimwe mu bihugu bikaba bikomeje guhura n’ikibazo cyo gupima abantu.

Poon avuga ko ibindi bibazo bishobora gutuma ibihugu bimwe bihura n’iki kibazo cyo gupima, harimo ibipimo bidakorwa neza, abaganga babizi neza n’ibindi.

Olfert Landt yakoze udukoresho twa mbere dupima Coronavirus

Dr Leo Poon avuga ko hari impamvu nyinshi zituma bimwe mu bihugu bikigorwa no gupima abafite ubu bwandu

Leave a Reply

Your email address will not be published. Required fields are marked *