Coronavirus yatumye abantu bava i Rubavu bagera i Huye n’amaguru.

  • by

Abagabo n’abasore barindwi bakoraga mu mushinga wa Kivu Belt ucukura ‘Gaz Méthane’ mu Kiyaga cya Kivu bakoze urugendo rw’amaguru baturutse mu Karere ka Rubavu, bacumbika ku biro by’akagari ka Kibariro, Umurenge wa Rwaniro mu Karere ka Huye, ahagana saa kumi z’umugoroba kuri uyu wa 25 Werurwe 2020.

Aba ni: Minani Emmanuel w’imyaka 27 y’amavuko, Nsabimana Jean Pierre w’imyaka 30, Ndayisaba Alexandre w’imyaka 23 na Gilbert w’imyaka 26 bavuka mu Karere ka Nyaruguru mu Murenge wa Ngoma, Sibobugingo Emmanuel w’imyaka 17 na Ndayisenga Eric w’imyaka 25 bavuka mu Murenge wa Nyagisozi muri Nyaruguru na Nsekanabanga Eric w’imyaka 40 uvuka mu Murenge wa Kigembe mu Karere ka Gisagara.

Ubuyobozi bw’Akagari ka Kibiraro bwahamirije Bwiza.com aya makuru. Umuyobozi Ushinzwe Itetambere ry’Ubukungu, Hagumineza Protogène wavuganye n’aba basore n’abagabo,ati: “ Ni byo koko ni abantu barindwi b’igitsina gabo, bakoraga mu mushinga wa Kivu Belt. Batugezeho nka saa kumi, batubwira ko bananiwe batabasha gukomeza kugenda, icyiza ari uko bacumbika ku buyobozi.”

Bwiza.com yabajije SEDO Hagumineza niba bakomeza urugendo rubageza iwabo n’amaguru, aravuga ngo “ Ni n’amaguru kuko n’ubundi bavuye i Rubavu n’amaguru.”

Abajijwe niba mbogamizi z’uko basubizwa inyuma muri iki gihe Leta yafashe ingamba zo gukumira icyorezo cya Coronavirus isaba ko hatakorwa ingendo ziva hamwe zijya ahandi, avuga nta mbogamizi zihari.

Uyu muyobozi yakomeje agira ati ” Ni ukuvuga ngo aho bagiye banyura hose, bagaragazaga bakoreraga uwo mushinga kandi imirimo kandi imirimo yahagaze, noneho nta na ‘contrat’ irambye bari bafitanye n’uwo mushinga.”

Uyu muyobozi avuga ko aba bantu basubiye iwabo imirimo bakoraga imaze guhagarara.

Mu masaa kumi n’imwe y’igitondo cy’uyu wa 26 Werurwe 2020 ni bwo aba bantu bavuye ku biro by’akagari ka Kibiraro, basubukura urugendo rwabo. Intera bamaze iri hagati y’Akarere ka Rubavu (mu mugi) na Huye igera ku bilometero 213 (213KM).

Leave a Reply

Your email address will not be published. Required fields are marked *